дереккөз фото: adyrna.kz
Қазақстанда теміржол машина жасау саласы тұрақты өсім көрсетуде. Биылғы жылдың алғашқы бес айының қорытындысы бойынша өндіріс көлемі өткен жылдың сәйкес кезеңімен салыстырғанда 22,5 пайызға артты.
Саладағы оң динамика жүк және жолаушылар вагондары, локомотивтер мен қосалқы бөлшектер өндірісінен байқалып отыр. Жалпы алғанда, вагондардың барлық түрі бойынша өндіріс көлемі кемінде 9 пайызға өскен. Ал жекелеген өнім түрлері бойынша көрсеткіштер 1,7 есеге дейін артқан.
Мамандардың айтуынша, бұл өсім елдегі өнеркәсіптік әлеуеттің нығайып, отандық теміржол техникасына сұраныстың артқанын көрсетеді. Сонымен қатар өндірістің ұлғаюы жаңа жұмыс орындарын ашуға және көлік-логистика саласының дамуына оң әсер етуде.
Теміржол машина жасау саласының дамуы Қазақстанның транзиттік мүмкіндіктерін күшейтіп, көлік инфрақұрылымын жаңғыртуға серпін береді. Сарапшылар бұл бағыттағы өсім жыл соңына дейін сақталады деп болжап отыр.