Түркістан қалалық орталық ауруханасының хирургия бөлімінің дәрігерлері өздерінің жоғары кәсібилігі мен жанашырлығының арқасында науқастардың шынайы ризашылығына ие болуда. Ота жасатып, ем қабылдаған пациенттер медицина мамандарына деген алғыстарын білдіріп, олардың еңбегін ерекше бағалауда.
Хирургия бөлімінің меңгерушісі Абай Амантайұлы бастаған білікті дәрігерлер – Азамат, Зайниддин, Марат және Батыр – науқастарға сапалы медициналық қызмет көрсетіп, олардың тез сауығып кетуіне бар күш-жігерін жұмсауда. Пациенттердің айтуынша, мұндағы мамандар тек кәсіби шеберлігімен ғана емес, сондай-ақ адами қамқорлығымен де ерекшеленеді.
«Біз Түркістанға түрлі аймақтардан ем іздеп келдік. Хирургтер жоғары деңгейде көмек көрсетіп қана қоймай, моральдық қолдау да білдірді. Олардың жанашырлығы мен кәсібилігіне шын жүректен алғыс айтамыз!» – дейді емделушілердің бірі.
Отадан кейінгі оңалту кезеңінің дұрыс ұйымдастырылуы, әр науқасқа ерекше көңіл бөлінуі және заманауи медициналық әдістерді қолдану – Түркістан қалалық орталық ауруханасының хирургия бөлімін сенімді емдеу орны ретінде танытады. Мұндағы дәрігерлер өз істеріне аса жауапкершілікпен қарап, науқастардың өмірін сақтап қалу жолында аянбай еңбек етуде.
Науқастардың алғысы – медицина қызметкерлерінің еңбегіне берілген ең жоғары баға. Түркістандық хирургтер өз біліктілігін одан әрі жетілдіре отырып, халыққа сапалы қызмет көрсетуін жалғастыра бермек.