Хат пен халықтың өтініші қағаз жүзінде қалып қоймауы тиіс. Түркістан облысында мемлекеттік органдарға жүктелген тапсырмалардың орындалуы, тұрғындардың өтініштерінің уақтылы қаралуы және халықпен кездесулерде көтерілген мәселелердің шешілу барысы қатаң бақылауға алынды.
Түркістан облысы әкімі аппаратының басшысы Файзулла Байдуллаевтың төрағалығымен өткен мәжілісте осы мәселелер жан-жақты қаралды.
Күн тәртібінде жоғары тұрған және жергілікті атқарушы органдардан келіп түсетін хаттардың назарға алынуы, азаматтардың өтініштерін белгіленген мерзімде орындау, сондай-ақ облыс әкімінің хаттамалық тапсырмаларының жүзеге асырылуы талқыланды.
Жиында облыс әкімдігі аппаратының құжат айналымын қамтамасыз ету және бақылау бөлімінің басшысы Камелия Дүйсебекова баяндама жасап, атқарылған жұмыстар мен бақылауды қажет ететін мәселелерді жеткізді. Талқылауға облыстық басқармалардың басшылары қатысты.
ХАЛЫҚТЫҢ ӨТІНІШІ – ЖАЙ ҒАНА ҚҰЖАТ ЕМЕС
Мемлекеттік басқарудағы басты талаптардың бірі – азаматтардың өтінішіне дер кезінде жауап беріп қана қоймай, көтерілген мәселенің нақты шешілуіне қол жеткізу.
Осы бағытта мәжілісте 2026 жылдың алғашқы алты айының қорытындысы бойынша Ашықтық индексінің бағалануы, сондай-ақ азаматтардың өтініштерімен жұмыс жүргізу мәселелері қаралды.
Өтініштерді қарауды бақылау бөлімінің басшысы Айдана Амирбек аталған бағыттағы жұмыстар жөнінде ақпарат берді.
Мұндағы басты міндет – тұрғынның мәселесін қағаз жүзінде тіркеп қою емес, оның түйінін тарқату.
ӘКІММЕН КЕЗДЕСУДЕ АЙТЫЛҒАН ӘР МӘСЕЛЕ НАЗАРДА
Мәжілісте облыс әкімінің халықпен кездесулері барысында тұрғындар тарапынан көтерілген мәселелердің орындалу барысы да арнайы талқыланды.
Халықпен жүздесулерде айтылған ұсыныстар мен проблемалардың шешілуі – жергілікті атқарушы органдар жұмысының маңызды көрсеткіштерінің бірі. Сондықтан жауапты басқармаларға нақты міндеттер жүктеліп, олардың орындалу барысы сараланды.
Файзулла Байдуллаев Мемлекет басшысы, Үкімет және облыс әкімі тарапынан берілген тапсырмалар мен міндеттердің, сондай-ақ хаттар мен тұрғындардың өтініштерінің тұрақты бақылауда болуы керектігін атап өтті.
Оның айтуынша, әрбір тапсырма белгіленген талапқа сай әрі жедел орындалуы тиіс.
Мәжіліс қорытындысында күн тәртібіндегі мәселелер бойынша жауапты басқарма өкілдеріне нақты тапсырмалар берілді. Олардың орындалуы бақылауға алынды.
Басты қағида – тапсырма берумен жұмыс бітпейді. Нәтиже болуы керек. Ал тұрғынның өтініші жауапсыз қалмауы тиіс.