Түркістан облысының көрікті табиғаты халықаралық спорт додасына арқау болды. Сайрам-Өгем мемлекеттік ұлттық табиғи паркінің аумағында өткен Sairam-Su Trail 2026 халықаралық тау жарысына 700-ге жуық кәсіби спортшы мен әуесқой жүгіруші қатысты. Табиғат аясындағы спорттық шараға жанкүйерлер мен қонақтарды қосқанда, жалпы саны 1000-ға жуық адам жиналды.
Жарысқа Қазақстанның әр өңірінен, Орталық Азия мен ТМД елдерінен, сондай-ақ АҚШ-тан келген қатысушылар қосылды. Олар 5 және 8 шақырымдық қашықтықтарда бақ сынап, таулы өлкенің күрделі бағытын еңсерді. Іс-шара TURKISTAN ENERGY бастамасы аясында ұйымдастырылып, негізгі ұйымдастырушысы ретінде «Open Turkistan» туристік ақпараттық орталығы танылды.
Табиғи әлеует – туризмді дамытудың жаңа мүмкіндігі
Sairam-Su Trail жарысының басты мақсаты – экологиялық, тау және спорт туризмін дамыту, Түркістан облысының табиғи көрікті жерлерін халықаралық деңгейде таныту. Мұндай бастамалар өңірдің туристік тартымдылығын арттырып қана қоймай, жергілікті кәсіпкерліктің дамуына да серпін береді.
«Open Turkistan» бас директоры Асқар Әбубәкіровтің айтуынша, халықаралық спорттық іс-шаралар қонақүй, қоғамдық тамақтану, көлік және өзге де туристік қызметтерге сұранысты арттыруға мүмкіндік береді. Сонымен қатар ұлттық табиғи парктерде жауапты туризм мәдениетін қалыптастыру және табиғи байлықтарды сақтау маңызды.
Жасанды интеллект спортшылардың нәтижесін бақылауға көмектесті
Жарыстың технологиялық серіктесі – қазақстандық бұқаралық спортқа арналған AI SPORT мобильді платформасы. Жасанды интеллект технологияларын қолданатын қосымша дене белсенділігін бақылауға, спорттық жетістіктерді тіркеуге және түрлі челлендждерге қатысуға мүмкіндік береді.
Sairam-Su Trail барысында қатысушылар маршрут пен жүріп өткен қашықтықты тіркеу үшін AI SPORT қосымшасындағы GPS-трекерді пайдаланды. Осылайша, заманауи цифрлық шешімдер спорттық шараны ұйымдастыруға және қатысушылардың нәтижелерін бақылауға көмектесті.
Ұлттық цифрлық және AI-спорт федерациясының президенті, AI SPORT платформасының негізін қалаушы Ғабит Салтыбаев Қазақстанда спорттық туризмді дамытуға мүмкіндік мол екенін атап өтті. Оның пікірінше, мұндай жарыстар еліміздің табиғи әлеуетін танытып, заманауи технологияларды бұқаралық спорт мәдениетіне енгізуге жол ашады.
Еріктілер мен спорт қауымдастығының үлесі
Жарысты ұйымдастыруға 50 ерікті атсалысып, қатысушылардың қозғалысын үйлестіруге және іс-шараның өтуіне қолдау көрсетті. Тең ұйымдастырушылардың бірі – Shymkent Run Club (SRC). Жоба жаттықтырушы Айдана Түлкібектің қатысуымен жүзеге асты.
Іс-шара «Әділет» партиясының қолдауымен өтті. Жарыс аясында партия мүшелері Қазақстан Республикасының 25 қазанда атап өтілетін Республика күніне орай биіктігі 4100 метр болатын Тәуелсіздік шыңына көтерілді.
Sairam-Su Trail 2026 – спорт, табиғат және технология тоғысқан халықаралық бастама. Мұндай шаралар Түркістан облысының туристік әлеуетін кеңінен танытуға, салауатты өмір салтын насихаттауға және Қазақстанда бұқаралық спорт пен экотуризмді дамытуға ықпал етеді.