Республика күні қарсаңында Арыс қаласында Әл-Фараби атындағы жекеменшік бастауыш мектептің ресми ашылу салтанаты өтті. Жаңа білім ордасы балалардың сапалы білім алуына жағдай жасап, қаладағы білім беру инфрақұрылымын дамытуға бағытталған маңызды бастамалардың бірі болды.
Салтанатты жиынға қала әкімі Қайсар Маңқараев, ардагерлер, зиялы қауым өкілдері, білім саласының ардагерлері, ұстаздар мен оқушылар қатысты. Шара барысында жаңа мектептің көгілдір лентасы қиылып, білім ордасының ашылу рәсімі өткізілді. Қатысушылар жаңа мектептің жұмысына сәттілік тілеп, бұл бастаманың қала үшін маңыздылығын атап өтті.
120 оқушыға арналған жаңа мектеп жеке кәсіпкердің өз қаражаты есебінен ашылды. Білім ордасында білікті ұстаздар сабақ беріп, оқушылардың сапалы білім алуына қажетті жағдайлар жасалған. Сонымен қатар балалардың мектепке қатынауын жеңілдету мақсатында тасымал қызметі де ұйымдастырылған.
Жаңа мектептің ашылуы – қаладағы білім беру саласын дамытуға қосылған маңызды үлес. Әсіресе, оқушы орындарының тапшылығын азайту, балаларға қолайлы білім беру ортасын қалыптастыру және үш ауысымды оқытудың алдын алу бағытында бұл бастаманың маңызы зор.
Білім беру саласындағы инфрақұрылымды дамыту – өскелең ұрпақтың болашағына жасалған инвестиция. Жаңа мектептің ашылуы ата-аналар үшін де қуанышты жаңалық болып отыр. Себебі балалардың өз қаласында сапалы білім алып, қауіпсіз әрі қолайлы ортада оқуына мүмкіндік кеңейеді.
Білім ордасының атауы да ерекше мәнге ие. Әл-Фараби – әлемдік ғылым мен білімнің дамуына зор үлес қосқан ұлы ойшыл. Оның есімімен аталған мектептің ашылуы жас ұрпақты білімге, ізденіске және ғылымға баулуға бағытталған игі бастама ретінде бағаланады.
Республика күні қарсаңында ашылған жаңа мектеп – елдің болашағына, жас ұрпақтың білім алуына жасалған нақты қадам. Мұндай бастамалар Арыс қаласының білім беру әлеуетін арттырып, балаларға сапалы білім мен саналы тәрбие беруге жол ашады.
Жаңа мектеп – жаңа мүмкіндік. Білімді ұрпақ – ел болашағы!