Астанада Қазақстан Президенті Қасым-Жомарт Тоқаев пен Вьетнам Коммунистік партиясы Орталық комитетінің Бас хатшысы То Лам арасында шағын құрамда келіссөздер өтті. Мемлекет басшысы бұл сапарды екі ел арасындағы достықтың символы деп бағалады.
– Вьетнам – Қазақстанның Азиядағы маңызды серіктесі. Біз ортақ мақсаттарға жету жолында бірлесіп әрекет етуге дайынбыз. Алдағы айда дипломатиялық қарым-қатынасымыздың орнағанына 33 жыл толады, – деді Президент.
То Лам қазақ елінде көрсетілген қонақжайлылық үшін ризашылық білдіріп, келіссөздер екіжақты байланысты одан әрі нығайтатынына сенім білдірді.
– Сіздің Вьетнамға жасаған сапарыңыздан кейін біздің елдің Қазақстанға арнайы келуі – мемлекеттеріміз арасындағы сенім мен серіктестіктің нақты көрсеткіші. Қазақстан – Вьетнамның Орталық Азиядағы алғашқы стратегиялық серіктесі болады, – деді То Лам.