Президент Қасым-Жомарт Тоқаевтың төрағалығымен Қауіпсіздік Кеңесінің отырысы өтіп, онда еліміздің көлік-логистика саласын дамыту мәселелері қаралды. Жиын барысында Көлік министрі Марат Қарабаев пен бірқатар орталық мемлекеттік органдар басшыларының баяндамалары тыңдалды.
Президент көлік саласындағы қордаланған мәселелер мен белгіленген межелердің орындалмауын сынға алып, бұл жаңғырту жұмыстарын тежеп отырғанын атап өтті. Ол шекарадағы жүк өткізу қиындығын, өткізу бекеттерінің тозғанын және ірі инфрақұрылымдық жобалардың кешігуін айрықша атап көрсетті.
Қасым-Жомарт Тоқаев «Жасыл дәліз» жүйесін енгізу арқылы логистикалық әлеуетті тиімді пайдалануға үндеді. Оның айтуынша, қазіргі жаһандық сын-қатерлер жағдайында Қазақстан өзінің бәсекелестік артықшылығын нығайта түсуі тиіс.
Сондай-ақ, Президент жүк тасымалы көлемін арттыру үшін авиаотынмен қамтамасыз ету маңызды екенін айтты. Ол еліміздің жаһандық жеткізу тізбектеріне белсенді қосылуы және жүк тасымалы көлемін көбейту міндетін қойды.
Жиын соңында Мемлекет басшысы министр Марат Қарабаевқа жұмысындағы кемшіліктер үшін сөгіс жариялап, көлік-логистика саласындағы түйткілдерді шешу бойынша нақты шаралар қабылдауды тапсырды.