Бүгін еліміздегі барлық мектепте соңғы қоңырау соғылып, мыңдаған оқушы білім ордасымен қоштасты. Түркістан қаласында да бұл күн салтанатты түрде атап өтілді.
Қала әкімі Әзімбек Пазылбекұлы Төле би атындағы №19 мектепте өткен шараға арнайы қатысып, түлектерге ақ жол тіледі. Ол өз сөзінде оқушыларды алда үлкен өмір жолы күтіп тұрғанын еске салып, білім мен еңбектің маңызын атап өтті.
– Арманға апарар жол – білім мен еңбектен басталады. Қайда жүрсеңдер де туған жер – қасиетті Түркістанның абыройын арттыра беріңдер. Жарқын болашақ, сәттілік тілеймін! – деді қала басшысы.
2023-2024 оқу жылында Түркістан қаласында 55 252 оқушы білім алса, соның ішінде 3069 оқушы мектепті аяқтады. 244 түлек – «Үздік аттестатқа», ал 183 оқушы «Алтын белгіге» үміткер. 44 мектептен 2799 түлек Ұлттық бірыңғай тестілеуге қатысады.