Қазығұрт ауданында қоршаған ортаны қорғау және экологиялық мәдениетті қалыптастыру бағытында кезекті кең көлемді сенбілік өтті. Шара Қазақстанда қолға алынған «Таза Қазақстан» бағдарламасы аясында ұйымдастырылып, жергілікті тұрғындар мен мекеме қызметкерлерін бір арнаға тоғыстырды.
Аудан әкімдігі бастамашы болған тазалық жұмысына ауылдық округ әкімдіктері, білім беру ұйымдарының қызметкерлері, түрлі мекемелердің өкілдері, жастар мен қарапайым тұрғындар қатысты. Жалпы, 2 мыңға жуық адам сенбілікке шықса, жұмыс барысын жеңілдету үшін 13 арнайы техника жұмылдырылды.
Тазалық жұмыстары нәтижесінде 8,4 тоннаға жуық тұрмыстық қалдық жиналып, арнайы орындарға шығарылды. Қатысушылар ауыл ішіндегі негізгі көшелерді, жаяу жүргіншілер жолдарын, саябақтар мен қоғамдық орындарды қоқыстан тазартты. Сонымен бірге арық-атыздар аршылып, су арналары ретке келтірілді. Бұл өз кезегінде тек эстетикалық көрініске ғана емес, санитарлық жағдайға да оң әсерін тигізді.
Сенбілік барысында ағаш түптері әктеліп, көгалдандыру жұмыстарына да көңіл бөлінді. Гүлзарлар ретке келтіріліп, жасыл аймақтарды күтіп-баптау жұмыстары жүргізілді. Табиғат қорғау шарасына белсенді қатысқан жастардың айтуынша, мұндай бастамалар экологиялық жауапкершілікті арттырып қана қоймай, елді мекендердің көркін ашуға да ықпал етеді.
Жиналған қауым тазалықты сақтау тек бір күндік шарамен шектелмей, әрбір тұрғынның күнделікті дағдысына айналуы қажет екенін атап өтті. Осы ретте аудан әкімдігі жергілікті халықты қоршаған ортаға ұқыптылықпен қарауға шақырып, тазалық мәдениетін қалыптастырудың маңызына тоқталды.
Айта кетейік, Қазығұрт ауданында мұндай сенбіліктер жүйелі түрде өткізіліп келеді. Алдағы уақытта ауданның барлық ауылдық округтерінде жалғасын тауып, экологиялық ахуалды жақсартуға бағытталған кешенді шаралар жалғаспақ.
Экологиялық мәдениетті көтеру – тек билік пен мемлекеттік органдардың ғана емес, әрбір азаматтың ортақ міндеті. Табиғатты қорғау, қоқысты азайту және жасыл желекті көбейту – келешек ұрпақ үшін таза әрі қолайлы орта қалыптастырудың кепілі.