Түркістан облысында вирусты А гепатитімен тіркелген науқастар саны азайған. Биылғы жылдың 9 айында өңірде 61 жағдай анықталып, бұл көрсеткіш өткен жылмен салыстырғанда 1,7 есеге төмендеген.
Облыстық санитариялық-эпидемиологиялық бақылау департаменті басшысының орынбасары Ақерке Мақұлбекқызының айтуынша, науқастардың басым бөлігі – балалар. Олардың 49,1 пайызы – мектеп оқушылары, ал 24,5 пайызы – мектепке дейінгі жастағылар.
Маман аурудың алғашқы белгілерін жиі тұмаумен шатастырып алатынын айтты. Әлсіздік, дене қызуының көтерілуі, тәбеттің төмендеуі, жүрек айну, іштің оң жақ бөлігі ауырсыну және терінің сарғаюы – гепатиттің басты белгілері.
Ақерке Мақұлбекқызының сөзінше, дерттің алдын алудың ең тиімді жолы – екпе салдыру. «А гепатитіне қарсы вакцинация елімізде тегін жүргізіледі. Ұлттық егу күнтізбесіне сәйкес, екпе екі кезеңмен, 6 ай аралықта салынады», – деді ол.
Мамандар тұрғындарды жеке гигиена ережелерін сақтап, белгісіз тамақ өнімдерін тұтынбауға шақырды.