Арыс қалалық мәслихатының депутаттығына кандидат Момбекова Сапаркүл Тілданқызы сайлауалды бағдарламасында қаланың инфрақұрылымын дамыту, тұрғындарды жұмыспен қамту, кәсіпкерлікті қолдау, білім мен медицинаның қолжетімділігін арттыру мәселелеріне басымдық берген. Бұған дейін қалалық мәслихаттың екі шақырылымында депутат болған үміткер тұрғындар көтерген мәселелердің шешілуіне жүйелі түрде ықпал етуді мақсат етіп отыр.
Сапаркүл Момбекова 1972 жылғы 10 қарашада Арыс қаласында дүниеге келген. 1989 жылы С. Қожанов атындағы қазақ орта мектебін тәмамдап, сол жылы Алматы теміржол инженерлері институтына оқуға түскен. 1993 жылы аталған оқу орнын экономист мамандығы бойынша бітірген.
1995 жылдан бері жеке кәсіпкерлікпен айналысады. Сонымен қатар Арыс қалалық мәслихатының III және VIII шақырылымдарының депутаты болып сайланған. Отбасылы, екі ұл мен екі қыз тәрбиелеп өсірген.
Кандидаттың сайлауалды бағдарламасы «Әділет» партиясының бағдарламалық басымдықтарына негізделген. Онда қала мен ауылдық елді мекендердің әлеуметтік-экономикалық дамуына, тұрғындардың тұрмыс сапасын жақсартуға және халықтың өзекті мәселелерін шешуге бағытталған 11 негізгі міндет қамтылған.
Үміткердің бағдарламасындағы негізгі бағыттардың бірі – қала ішіндегі автомобиль жолдарының сапасын жақсарту. Сапаркүл Момбекова көшелерді орташа және күрделі жөндеуден өткізу, қоғамдық көлік қызметінің сапасын арттыру және қалаішілік тасымалдың қолжетімділігін жақсарту мәселелерін көтеруді жоспарлап отыр.
Сондай-ақ Әл-Фараби көшесіндегі мектепке апаратын жолдарды ретке келтіру, оқушылардың қауіпсіз жүріп-тұруына жағдай жасау мәселесіне ерекше назар аударған.
Кандидат білім беру саласында С. Қожанов атындағы мектептің материалдық-техникалық базасын жақсартуға, балалар мен жасөспірімдерге арналған спорт және ойын алаңдарын көбейтуге ықпал етуді көздейді.
Денсаулық сақтау бағытында Арыс қаласындағы орталық аурухана мен емхананың жабдықталуын жақсарту, бейінді дәрігерлердің қызметіне қолжетімділікті арттыру және ауылдық елді мекендерге медицина мамандарын тарту мәселелері қамтылған.
Бұл бағытта «Дипломмен ауылға» секілді мемлекеттік қолдау бағдарламаларының мүмкіндіктерін пайдалануға басымдық берілген.
Сапаркүл Момбекованың сайлауалды бағдарламасында кәсіпкерлікті дамыту мен халықты тұрақты жұмыспен қамту мәселелері маңызды орын алады. Кандидат қала экономикасына инвестиция тартуға, шағын және орта бизнесті қолдауға, ауыл шаруашылығы өнімдерін өңдеу бағытындағы жобаларды дамытуға ықпал етуді жоспарлаған.
Сонымен қатар кәсіп ашуға ниетті азаматтарға мемлекеттік бағдарламалар арқылы жеңілдетілген несие мен субсидия алу мүмкіндіктерін кеңейтуге жәрдемдесуді көздейді. «Ауыл аманаты» бағдарламасы аясында отбасылық кәсіпкерлікті, жеке қосалқы шаруашылықтарды және ауыл шаруашылығы кооперативтерін қолдау да негізгі бағыттардың бірі ретінде көрсетілген.
Үміткер тұрғын үй кезегінде тұрған азаматтардың баспана мәселесін заң талаптарына сәйкес шешуге ықпал етуді маңызды міндеттердің бірі санайды. Сонымен қатар көпбалалы және аз қамтылған отбасыларды, қарттарды, мүгедектігі бар азаматтарды әлеуметтік қолдау, мемлекеттік қызметтердің қолжетімділігін арттыру мәселелеріне назар аударған.
Қала мекемелерінде ерекше қажеттілігі бар азаматтарға қолайлы жағдай қалыптастыру да бағдарламада қамтылған. «Таза Қазақстан» бағдарламасы аясында көшелерді абаттандыру, көгалдандыру, қоқыс жинау және шығару жүйесін жақсарту, қоғамдық орындардың тазалығын қамтамасыз ету мәселелері де кандидаттың назарында.
Сапаркүл Момбекова тұрғындарға қолайлы қоғамдық кеңістіктер қалыптастыруға, балалар мен жастардың бос уақытын тиімді өткізуіне жағдай жасауға ықпал етуді жоспарлап отыр.
Кандидат сайлауалды бағдарламасындағы міндеттерді жүзеге асыруда тұрғындармен тұрақты байланыс орнатуға ерекше мән береді. Ол сайлаушылардан түскен ұсыныс-пікірлер мен өтініштерді жинақтап, нақты іс-шаралар жоспарын әзірлеуді, көтерілген мәселелерді тиісті мемлекеттік органдарға жеткізіп, олардың орындалуын бақылауды көздейді.
Сондай-ақ қабылданған шешімдер мен атқарылған жұмыстар бойынша тұрғындар алдында ашық есеп беруді жоспарлаған.
Осылайша, Сапаркүл Момбекованың сайлауалды бағдарламасы жол, білім, медицина, тұрғын үй, кәсіпкерлік және әлеуметтік қолдау секілді Арыс тұрғындары үшін өзекті бағыттарды қамтиды. Үміткер депутаттық және кәсіпкерлік тәжірибесін қаланың дамуына бағытталған бастамаларды ілгерілетуге пайдалануды мақсат етіп отыр.
Жарияланым кандидаттың республикалық бюджет қаражатынан төленді.
