2025 жылдың 5 мамырында Арыс қаласында «Рухани көшбасшылық: өзіңді табу және дамыту» атты TEDx форматындағы кездесу өтті. Іс-шараны «Руханият орталығы» мен «Шаңырақ» жастар мен жас отбасыларды қолдау орталығы» қоғамдық бірлестігі бірлесе ұйымдастырды.Бұл туралы Arysinfo.kz тілшісі хабарлайды.
Кездесудің басты мақсаты — жастар арасында азаматтық белсенділікті арттыру, жеке даму мен көшбасшылық қасиеттерді қалыптастыру және өмірлік құндылықтар туралы ой бөлісу болды.
Спикерлер қатарында:
- Байзахова Сабира Мұратқызы – «Шаңырақ» орталығының басшысы,
- Ділдәбеков Бақтығали Сәрсенбекұлы – «AMANAT» партиясының Арыс қалалық филиалының төрағасы, қалалық мәслихат депутаты,
- Утегенова Жұлдыз Төлебековна – кәсіби медиатор, Қазақстан Халқы Ассамблеясы жанындағы медиация кеңесінің мүшесі, Қазақстан Журналистер Одағының мүшесі, «Arysinfo» ақпараттық сайтының бас редакторы.
Спикерлер өз тәжірибелерімен бөлісіп, жетістікке жетудің жолдары, өз-өзіңді тану мен қоғамдағы жауапкершілікті сезіну туралы ой қозғады. Қатысушылармен ашық пікір алмасу форматында өткен кездесу жас буынның белсенді азаматтық ұстаным қалыптастыруына оң ықпалын тигізді.
TEDx — бүкіл әлем бойынша жүзеге асырылатын, идея таратуға бағытталған тәуелсіз формат. Арыс қаласындағы бұл шара да жергілікті деңгейде азаматтық қоғамның нығаюына серпін беріп отыр.