Сурет: Қазығұрт ауд әкімдігі
Қазығұрт ауданында газ баллондарын пайдаланатын нысандардағы қауіпсіздік талаптарының сақталуын қадағалау мақсатында арнайы профилактикалық іс-шаралар өткізілді. Тексеру жұмыстары аудан әкімдігінің тұрғын үй және газ инспекциясы бөлімінің бастамасымен ұйымдастырылды.
Бақылау барысында қоғамдық тамақтану орындары, сауда және қызмет көрсету нысандары, сондай-ақ газ баллоны қолданылатын басқа да коммерциялық мекемелер қамтылды. Тексеру кезінде газ баллондары мен газ жабдықтарының техникалық жай-күйі, олардың орнатылуы мен пайдаланылуы қолданыстағы қауіпсіздік нормаларына сәйкестігі тұрғысынан қаралды.
Сонымен бірге мекеме иелері мен жауапты қызметкерлерге газды пайдалану кезіндегі қауіпсіздік ережелері түсіндіріліп, ықтимал қауіп-қатерлердің алдын алу бойынша нақты нұсқаулықтар берілді. Қауіпсіздік талаптарын сақтау қажеттігі жөнінде ескерту парақшалары таратылды.
Аталған іс-шаралардың басты мақсаты – тұрғындардың өмірі мен денсаулығын қорғау, төтенше жағдайлардың алдын алу және газ баллондарын пайдалану кезінде қауіпсіз ортаны қамтамасыз ету.
Бұл бағыттағы бақылау жұмыстары алдағы уақытта да тұрақты түрде жалғасын табатын болады.