Түркістан облысының Қазығұрт ауданында «Таза Қазақстан» жобасы аясында ауқымды сенбілік өтті. Іс-шара барысында елді мекендерді көгалдандыру және экологиялық ахуалды жақсарту бағытында жұмыстар жүргізіліп, 8 мыңға жуық ағаш көшеті отырғызылды.
Шараға аудан әкімі Азизхан Исмаилов қатысып, жастармен бірге тал екті. Ол табиғатты қорғау бастамаларын жалғастыру, жасыл аймақтарды кеңейту және отырғызылған ағаштарды күтіп-баптаудың маңызын атап өтті.
Жалпы биыл аудан бойынша 18 мың түп ағаш отырғызу жоспарланған. Экологиялық акциялар ауданның барлық ауылдық округтерінде қатар ұйымдастырылып, тазалық пен көгалдандыру жұмыстары жүйелі түрде жалғасуда.