Шымкент қаласында бой көтеріп жатқан студенттерге арналған жаңа жатақхана құрылыс нормалары мен талаптарын өрескел бұзған. Бұл туралы ҚР Өнеркәсіп және құрылыс министрлігіне қарасты Құрылыс және тұрғын үй-коммуналдық шаруашылық істері комитетінің тексерісі нәтижесінде белгілі болды.
Атап айтқанда, А.Байтұрсынов көшесі 12/2 мекенжайындағы ғимараттың тым жақын маңда орналасқан көпқабатты тұрғын үйге тиіп тұрғаны анықталған. Бұл сәулет және құрылыс стандарттарына қайшы келеді.
Тексеру жұмыстары қалалық орта сапасы және бақылау басқармасы тарапынан қала тұрғынының шағымы негізінде жүргізілген. Құқық бұзушылықтар анықталғаннан кейін, жауапты тұлғалар — тапсырыс беруші, авторлық және техникалық қадағалаушылар, сондай-ақ мердігер компанияға қатысты ҚР Әкімшілік құқықбұзушылық туралы кодексі аясында тиісті шаралар қабылданды.
Сонымен қатар, нысанға берілген эскиздік жоба мен жоспарлау-сәулет құжаттамасы министрлік нұсқамасына сәйкес күшін жойғаны хабарланды.
Бұл жағдай құрылыс саласындағы бақылаудың маңыздылығын тағы бір дәлелдеп отыр. Қала тұрғындарының қауіпсіздігі мен жайлы өмір сүру ортасын қамтамасыз ету үшін тиісті органдар алдағы уақытта да осындай тексерістерді тұрақты түрде жалғастырмақ.