Түркістан қаласындағы «Достық үйінде» тілдік және этностық белгілер бойынша кемсіту мен қорлаудың кез келген түріне жол бермеуге бағытталған республикалық семинар-кеңес өтуде.
Іс-шара «Оңтүстік өңірлерде тілге қатысты және этностық белгілері бойынша ар-намысқа тию мен қорлаудың кез келген түріне жол бермеу» әлеуметтік жобасы аясында ұйымдастырылуда.
Семинардың мақсаты – қоғамда өзара құрмет пен толеранттылық мәдениетін қалыптастыру, тілдік және этностық белгілер бойынша кемсітушіліктің алдын алу, сондай-ақ қоғамдық келісім мен тұрақтылықты нығайту мәселелерін талқылау.
Жиынның ашылуында Қоғамдық даму басқармасының басшысы Жанар Бектаева сөз сөйлеп, Түркістан өңірінде жүзеге асырылып жатқан танымдық-тағылымдық жобаларға тоқталды. Ол семинардың маңыздылығын атап өтіп, қатысушыларға сәттілік тіледі.
Республикалық семинар-кеңеске ғылыми-сарапшылық топ мүшелері, Республикалық Журналистер клубының төрағасы Алишер Сатвалдиев, ғалымдар, этномәдени бірлестіктердің өкілдері және сала мамандары қатысуда.
Іс-шараға Түркістан облыстық «Қоғамдық келісім» мекемесінің басшысы Эльмира Жангазиева модераторлық етуде.
Семинар барысында тілдік және этностық ерекшеліктерге байланысты кемсітушілік пен қорлаудың алдын алу, қоғамдағы өзара түсіністік пен сыйластықты арттыру, ақпараттық-түсіндіру жұмыстарын жетілдіру және қоғамдық келісімді нығайту мәселелері талқылануда.
Мұндай бастамалар қоғамда бейбітшілік пен бірлікті сақтауға, азаматтардың құқықтары мен қадір-қасиетін құрметтеуге және түрлі этнос өкілдері арасындағы достық қарым-қатынасты нығайтуға бағытталған.