Түркістан облысында агроөнеркәсіп кешенін дамыту бағытында ауқымды инвестициялық жобалар кезең-кезеңімен жүзеге асырылуда. Соның бірі – 50 мың бас ірі қара малға арналған заманауи бордақылау кешенінің құрылысы. Нысанды толық қуатына шығару 2026 жылдың шілде айына жоспарланып отыр.
Аталған жоба «Turkestan Agro.kz» ЖШС базасында іске асырылуда. Кешен іске қосылғаннан кейін өңірдің ет өндірісі айтарлықтай артып, ішкі нарықты сапалы өніммен қамту мүмкіндігі кеңейеді.
Жоба тек өндірістік қуатты арттырумен шектелмейді. Ол – азық-түлік қауіпсіздігін нығайтуға, экспортқа бағытталған өнім көлемін ұлғайтуға және отандық агросектордың бәсекеге қабілеттілігін арттыруға бағытталған маңызды бастама.
Сарапшылардың айтуынша, мұндай ірі кешендердің іске қосылуы ауыл шаруашылығында жаңа серпін беріп, қосымша жұмыс орындарын ашуға, ауылдық аумақтардың әлеуметтік-экономикалық дамуына оң әсер етеді.
Жалпы, Түркістан облысында аграрлық салаға инвестиция тарту қарқыны жоғары. Бұл өз кезегінде өңірдің еліміздегі жетекші аграрлық аймақтардың біріне айналуына негіз қалайды.