Түркістан қаласында көпқабатты тұрғын үйлердің сыртқы келбетін жаңарту бағытындағы жұмыстар қарқынды жүргізілуде. Қаланың сәулеттік келбетін жақсартып, тұрғындарға қолайлы орта қалыптастыру мақсатында жүйелі түрде жаңғырту шаралары қолға алынған.
Бүгінде Жаңа қала аумағындағы тұрғын үйлердің қасбеттері ретке келтіріліп, айналасы тазартылып, көріктендіру жұмыстары жүргізілуде. Әсіресе көктемгі маусым аясында 9 және 11 көшелер бойында орналасқан 10-нан астам көпқабатты тұрғын үйде жөндеу жұмыстары қарқын алған.
Жаңарту барысында ғимараттардың қасбеттері әрленіп қана қоймай, кіреберістері мен қоршаулары да жөнделуде. Сонымен қатар, іргелес аумақтарды абаттандыру жұмыстары кезең-кезеңімен іске асырылып жатыр.
Аталған жұмыстар қаланың заманауи келбетін қалыптастыруға және тұрғындардың өмір сүру сапасын арттыруға бағытталған.