Актер, жайдарманшы, «Миллион» командасының мүшесі Мансар Орынхан Түркістан облысы күрес федерациясының вице-президенті қызметіне тағайындалды.
Бұл туралы ол әлеуметтік желідегі парақшасында мәлімдеп, жаңа міндетті үлкен жауапкершілік деп қабылдайтынын айтты.
«Бұл – мен үшін үлкен жауапкершілік. Көрсетілген қолдау үшін Түркістан облысы күрес федерациясына және облыстық дене шынықтыру және спорт басқармасына алғыс білдіремін. Басты мақсат – ұлттық спорттың беделін көтеріп, жас буынға мотивация беру» – деді ол.
Мансар Орынхан алдағы уақытта күрес спортын кеңінен насихаттап, оның имиджін арттыруға және медиа бағытты жаңа деңгейге көтеруге күш салатынын жеткізді. Сондай-ақ, шығармашылық тәжірибесін осы салаға бағыттап, нәтижелі жұмыс істеуге ниетті екенін атап өтті.
Айта кетейік, ол бұған дейін де спорттық жобаларға қатысып, белсенділігімен көзге түскен.