Мәжіліс «Педагог мәртебесі және білім беру мәселелері туралы» заң жобасын және оған ілеспе Әкімшілік құқық бұзушылық туралы кодекске енгізілетін түзетулерді бірінші оқылымда мақұлдады.
Жаңа заң жобасына сәйкес, педагогтердің оқушылар алдындағы жауапкершілігі тек оқу үдерісімен шектелуі ұсынылып отыр. Ал балалардың өмірі, денсаулығы мен қауіпсіздігіне қатысты жауапкершілік ата-аналарға көбірек жүктелмек.
Сонымен қатар бір мезгілде қағаз және электронды есеп жүргізуге тыйым салу қарастырылған. Орта білім беру ұйымдарында ұялы телефондарды қолданудың бірыңғай тәртібі енгізілмек.
Бұдан бөлек, жергілікті атқарушы органдар деңгейінде оқушыларды ғылыми-зерттеу жұмыстарына тарту шараларын күшейту жоспарланып отыр.