Наурыз мейрамы – Мемлекет басшысы Қасым-Жомарт Тоқаев Ұлыстың ұлы күнін «Expo» көрме орталығында ұйымдастырылған этноауылда халықпен бірге атап өтті. Президент жиналған жұртшылыққа құттықтау сөзін арнап, Наурыз мерекесінің маңыздылығын атап өтті.
«Ұлыстың ұлы күні – ұлтымыздың ұлық мейрамы. Бұл – біздің ата дәстүріміз. Шуақты көктем мерекесінде бүкіл дүние қайта жаңғырады. Күн мен түн теңеледі. Қазақ елі Әз-Наурызды көне заманнан бері тойлап келеді. Ұлыстың ұлы күні биыл да қасиетті Ораза айымен тұспа-тұс келіп отыр. Еліміз үшін мұның мән-маңызы зор. Себебі біздің дініміз бен дәстүріміз – егіз. Қос қазынамыз халқымыздың бірегей болмысын айшықтай түседі», – деді Қасым-Жомарт Тоқаев.
Салтанатты шара аясында қазақтың ұлттық дәстүрлері, оның ішінде қолөнер көрмесі, ұлттық ойындар, халықтық әндер және театрландырылған қойылымдар ұсынылды. Президент көпшілікпен бірге Наурыз көже ішіп, ұлттық тағамдардан дәм татты.
Наурыз мейрамы биыл да ел ішінде кеңінен тойланып, Астана, Алматы, Шымкент және басқа қалаларда түрлі мәдени іс-шаралар ұйымдастырылды. Мереке ел бірлігі мен татулығын нығайтып, халқымыздың рухани құндылықтарын дәріптеуге тағы бір қадам болды.