Түркістанда велоспорттан Қазақстан чемпионаты басталды,-деп хабарлайды Arysinfo.kz тілшісі.
Мемлекет басшысының бұқаралық спортты қолдау және салауатты өмір салтын насихаттау бастамасы аясында Түркістанда велоспорттан ерлер мен әйелдер арасында Қазақстан Республикасының қысқы чемпионаты басталды. Бұл жарыс – өңірдің спорттық өміріндегі маңызды оқиғалардың бірі.
Велоспорт – тек төзімділік пен шеберлікті ғана емес, сондай-ақ қайсарлық пен жеңіске деген ұмтылысты талап ететін спорт түрі. Түркістан облысында бұл спортқа ерекше көңіл бөлініп, қазіргі таңда 200-ге жуық спортшы тұрақты түрде шұғылданады.
Турнирдің басты мақсаты – спортшылар арасындағы достық пен бәсекеге қабілеттілікті арттыру, сондай-ақ велоспортты халық арасында кеңінен насихаттау. Жарысқа еліміздің 18 өңірінен 200-ге жуық велошабандоз қатысып, өзара мықтыны анықтайды. Сонымен қатар, спортшылар Түркістанның туристік әлеуетімен де танысуға мүмкіндік алады.