Президент Қасым-Жомарт Тоқаев Астанада өткен Еуразиялық экономикалық форумда сөз сөйлеп, жасанды интеллект пен цифрлық трансформация тақырыбына тоқталды.
Мемлекет басшысы ЕАЭО-ның тек аймақтық ұйым емес, жаһандық экономикадағы маңызды құрылымға айналып келе жатқанын айтты.
Тоқаевтың мәліметінше, Goldman Sachs болжамына сәйкес, жасанды интеллект алдағы он жылда әлемдік жалпы ішкі өнімге шамамен 7 триллион доллар көлемінде өсім әкелуі мүмкін.
Сонымен қатар президент жаңа технологиялардың еңбек нарығына әсері күшейетінін атап өтті.
Оның айтуынша, жасанды интеллекттің дамуы салдарынан жұмыс орындарының шамамен 40%-ы қысқаруы ықтимал және көптеген адам қайта даярлаудан өтуге мәжбүр болады.
Президент Қазақстанның ЕАЭО аясында жасанды интеллектіні сауда, логистика, кеден және агроөнеркәсіп салаларында кеңінен қолдануды ұсынатынын жеткізді.
Сондай-ақ ол жаңа технологиялар ұйымға мүше елдер арасында цифрлық теңсіздік туғызбауы керегін айтты.
“Біз осы тарихи мүмкіндікті бірлесіп және толық көлемде пайдалануға міндеттіміз”, – деді Тоқаев.