Сурет: Түркістан обл әкімдігі
Түркістан облысының Созақ ауданында Астана күні қарсаңында 25 отбасы жаңа пәтердің кілтіне ие болды.
Жеткіншек мөлтек ауданында өткен салтанатты рәсімде әлеуметтік осал санаттағы азаматтар мен көпбалалы отбасыларға жаңа баспаналар табысталды.
Аудан әкімі Мұхит Тұрысбеков тұрғындарды құттықтап, баспанамен қамту жұмыстары алдағы уақытта да жалғасатынын айтты.
«Баспана – әр отбасының бақыты мен тұрақтылығының негізі. Бұл – халықтың әл-ауқатын жақсартуға бағытталған мемлекеттік қолдаудың нақты нәтижесі», – деді аудан басшысы.
Айта кетейік, бұған дейін Мемлекеттік рәміздер күні қарсаңында Созақта 29 отбасы баспаналы болған еді. Қазір тағы 22 пәтерді құжаттандыру жұмыстары жүргізіліп жатыр. Сонымен қатар аудан орталығында жаңа көпқабатты тұрғын үйлердің құрылысы жалғасуда.