Тараз қаласында инклюзивті спорт орталығының іргетасы қаланды. Жаңа әлеуметтік нысан Жамбыл облысында заманауи спорт инфрақұрылымын дамыту аясында бой көтеріп, мүгедектігі бар азаматтар мен жүріп-тұруы шектеулі адамдарға спортпен еркін айналысуға мүмкіндік береді.
Орталықта бейімделген жаттығу залдары, арнайы спорт алаңдары және барлық келушілерге қолайлы жағдай қарастырылады. Бұл жоба инклюзивті қоғам қалыптастыруға, салауатты өмір салтын насихаттауға және ерекше қажеттілігі бар азаматтардың спортқа қолжетімділігін арттыруға бағытталған маңызды бастама саналады.
Жаңа нысан өңірдегі әлеуметтік инфрақұрылымды нығайтып қана қоймай, мүмкіндігі шектеулі спортшылардың шеберлігін шыңдап, халықаралық жарыстарға дайындалуына да мүмкіндік береді. Бұл – Жамбыл облысында баршаға тең мүмкіндік беретін қоғам құру жолындағы маңызды қадам.