Болгарияда өткен 76-шы «Странджа кубогы» халықаралық турнирі өз мәресіне жетті. Бұл жарыс – әлемдегі ең беделді бокс додаларының бірі. Қазақстан құрамасы турнирде жоғары нәтижеге қол жеткізіп, жалпы есепте бірінші орын иеленді. Боксшыларымыз 5 алтын, 9 күміс, 4 қола медаль еншілеп, өздерінің мықтылығын тағы бір дәлелдеді.
Ұлттық құрама сапында өнер көрсеткен Түркістан облысының спортшылары да сәтті өнер көрсетіп, ел намысын абыроймен қорғады. Солардың бірі – Сарыағаш ауданының тумасы Шұғыла Нәлібай. Әйелдер арасында 75 келі салмақ дәрежесінде сынға түскен боксшы қола жүлдегер атанды.
Жалпы, түркістандық спортшылар турнир барысында 4 медаль жеңіп алып, ұлттық құраманың көш бастауына өз үлестерін қосты. Бұл жетістік – өңірдегі бокс мектебінің қарқынды дамып келе жатқанының айқын дәлелі.
Спортшыларымызды жарқын жеңістерімен құттықтап, алдағы додаларда да сәттілік тілейміз!