Түркістан облысында ауа райының қолайсыздығына байланысты полицейлер күшейтілген режимде қызмет атқаруда. Облыстық полиция департаментінің бастығы Мұрат Қабденовтің тапсырмасымен тәртіп сақшылары жолда қалған көліктерге көмектесіп, тұрғындардың қауіпсіздігін қамтамасыз етуде.
Соңғы тәуліктерде Түркістан облысында полицейлер бірнеше көлікке көмек қолын созды. Солардың бірі – «Батыс Қытай – Батыс Еуропа» тас жолының 2-шақырымында орын алды. Облыстық батальон қызметкерлері патрульдеу кезінде қарға батып, жол жиегіне шығып кеткен «Daewoo Gentra» маркалы көлікті байқап, жүргізушісіне жәрдемдесті. Олар көлікті трассаға шығарып, жүргізушінің сапарын жалғастыруына мүмкіндік берді.
Сонымен қатар, «Алматы-Ташкент-Термез» тас жолының 617-шақырымында тоқтап тұрған Қырғызстан Республикасының жүк көлігін байқаған полицейлер оның бұзылып қалғанын анықтады. Олар бірден көмекке келіп, жүргізушінің мәселесін шешуге атсалысты.
Қазақстандық тәртіп сақшыларының жедел әрекетіне риза болған шетелдік жүргізуші өз алғысын білдіріп, жылы лебізін жеткізді.