Табиғатты қорғау – бір күндік науқан емес, ортақ жауапкершілік. Осы мақсатта Түркістан облысында Мемлекет басшысының бастамасымен жүзеге асып жатқан «Таза Қазақстан» жалпыұлттық экологиялық акциясы аясында World Cleanup Day – Дүниежүзілік тазалық күніне орай ауқымды сенбілік ұйымдастырылды.
Негізгі тазалық жұмыстары Қаратау жотасының етегіндегі Ащысай елді мекенінде өтті. Экологиялық шараға 4 мыңнан астам адам қатысып, 70 арнайы техника жұмылдырылды. Тау бөктері мен қоғамдық аумақтар қоқыстан тазартылып, 93 тонна қалдық шығарылды. Жалпы 72 гектар аумақ қамтылды.
Сенбілікке Түркістан облысының әкімі Нұралхан Көшеров бастаған мемлекеттік қызметшілер, жастар, еріктілер, қоғамдық ұйымдар мен коммуналдық сала мамандары қатысты. Қоршаған ортаны көгалдандыру мақсатында 100 түп ағаш көшеті отырғызылды.
Бұл акцияның мәні – айналаны тазалаумен ғана шектелмейді. Негізгі мақсат – тұрғындардың экологиялық мәдениетін қалыптастырып, табиғатты қорғауға деген жауапкершілікті күшейту.
Түркістан облысында «Таза Қазақстан» аясындағы жұмыстар жүйелі жалғасуда. Өңір бойынша жалпыұлттық экологиялық акцияларға 74 мыңға жуық адам қатысқан.
Бұған дейінгі күзгі тазалық жұмыстарына да 15 мыңнан астам тұрғын атсалысып, 779,8 тонна қоқыс шығарылып, 508 гектардан астам аумақ тазартылған.
Тазалық – сенбілікте басталып, күнделікті мәдениетке айналғанда ғана нәтижелі.