Түркістан облысының туристік мүмкіндіктері Түркияның Анталья қаласында өтіп жатқан ATF Antalya 2026 халықаралық туристік көрмесінде таныстырылуда. 26–28 қазан аралығында ұйымдастырылған көрмеге Түркістан облысының делегациясы, оның ішінде Кентау қаласы мен Төле би ауданының өкілдері қатысып жатыр.
Халықаралық көрме туризм индустриясының өкілдерін, туроператорларды, туристік бизнес мамандары мен сарапшыларды бір алаңға жинап, тәжірибе алмасуға, іскерлік байланыстар орнатуға және жаңа ынтымақтастық бағыттарын дамытуға мүмкіндік береді.
Көрме аясында Қазақстанның бірқатар өңірлерінің туристік әлеуеті таныстырылуда. Түркістан облысы өзінің бай тарихи-мәдени мұрасын, рухани туризм бағыттарын және көрікті орындарын халықаралық аудиторияға ұсынуда.
Сонымен қатар Кентау қаласы мен Төле би ауданының туристік мүмкіндіктеріне ерекше назар аударылып, өңірдің тарихи орындары, табиғи ерекшеліктері мен туристерді қызықтыратын бағыттары кеңінен насихатталуда.
ATF Antalya 2026 халықаралық көрмесіне қатысу Түркістан облысының туристік тартымдылығын арттыруға және өңірді шетелдік туристерге кеңінен танытуға бағытталған.
Мұндай халықаралық алаңдар шетелдік әріптестермен байланыс орнатуға, туристік өнімдерді ілгерілетуге және туризм саласына инвестиция тарту мүмкіндіктерін кеңейтуге жол ашады.
Түркістан облысының халықаралық туристік көрмеге қатысуы өңірдің туристік әлеуетін жаңа деңгейге көтеріп, халықаралық ынтымақтастықты нығайтуға мүмкіндік береді.