Түркістан облысының Бәйдібек ауданында есірткі қылмысына қатысы бар деген күдікпен 49 жастағы жергілікті тұрғын қолға түсті. Оны аудандық полицияның жедел уәкілдері арнайы операция барысында ұстаған.
Тәртіп сақшылары күдіктінің үйіне тінту жүргізіп, сарай ішінен бірнеше ыдысқа салынған және газетке оралған өсімдік тектес күмәнді заттарды анықтады. Сараптама қорытындысы бұл заттардың марихуана мен сора өсімдігі екенін растады. Барлығы 20 грамға жуық кептірілген есірткі тәркіленген.
Қазір күдіктіге қатысты қылмыстық іс қозғалып, сотқа дейінгі тергеу амалдары жүргізіліп жатыр.