Бүгін Арыс қаласының барлық білім беру мекемелерінде «Соңғы қоңырау» салтанатты шарасы өтті. Қала әкімі Қайсар Маңқараев М.Әуезов атындағы мектептің түлектерімен жүздесіп, өмірдің жаңа кезеңіне қадам басып жатқан жастарға ақ тілегін арнады.
– Сіздер тек Арыстың ғана емес, Тәуелсіз Қазақстанның мақтанышы болыңдар! – деді әкім өз сөзінде. Оның мәліметінше, биыл қала мен ауыл мектептерін 1249 оқушы тәмамдаса, олардың ішінде 64-і «Алтын белгіге», 159-ы «Үздік аттестатқа» үміткер.
Шараға мектеп ұжымы, оқушылар, ата-аналар мен ардақты қонақтар жиналды. Жиында үздік оқушылар мен ұстаздар қала әкімінің алғыс хаттарымен марапатталып, құрметке бөленді. Түлектер ұстаздарына арнаған әндерін шырқап, мектеппен қимастықпен қоштасты.
Бұл күн – жас түлектердің жадында мәңгі сақталатын ерекше сәтке айналды.