Ақтас ауылында тазалық жұмыстары жүргізілді
Монтайтас ауылдық округіне қарасты Ақтас ауылында «Таза Қазақстан» экологиялық акциясы аясында сенбілік ұйымдастырылды. Іс-шараға жергілікті мекеме қызметкерлері қатысып, елді мекеннің тазалығын ретке келтіруге атсалысты.
Сенбілік кезінде ауыл ішіндегі аумақтар мен қоршаулардың сыртқы бөлігі тазаланып, жиналған қоқыстар шығарылды. Жұмыс барысында қоғамдық орындардың көркін жақсартуға және тұрғындарға қолайлы орта қалыптастыруға басымдық берілді.
Экологиялық акцияның негізгі міндеттерінің бірі – тұрғындардың қоршаған ортаға деген жауапкершілігін арттырып, тазалық мәдениетін қалыптастыру. Ұйымдастырушылар қоғамдық аумақтарды таза ұстау тек арнайы шара кезінде емес, күнделікті әдетке айналуы қажет екенін атап өтті.
«Таза Қазақстан» бастамасы аясындағы мұндай жұмыстар елді мекендерді абаттандыруға және қоршаған ортаны қорғауға бағытталған. Ақтас ауылында тазалық шараларына алдағы уақытта да көңіл бөлінетін болады.