Цифрлық технологиялардың дамуы интернет-алаяқтардың да әрекетін күшейтті. Бүгінде телефон қоңырауы, жалған хабарлама немесе әлеуметтік желідегі сілтеме арқылы азаматтардың ақшасын жымқыру фактілері жиілеп отыр. Сондықтан киберқауіпсіздік әр адамның жеке жауапкершілігіне айналды.
Мамандардың айтуынша, интернет-алаяқтыққа қарсы күрестің тиімділігін арттыру мақсатында АНТИФРОД жүйесі енгізілген. Бұл жүйе күмәнді қаржылық операцияларды анықтап, алаяқтық әрекеттердің алдын алуға мүмкіндік береді. Алайда технология қанша дамығанымен, сақтық шараларын әр азаматтың өзі ұстануы қажет.
Алаяқтардың құрбаны болмау үшін бірнеше қарапайым ережені есте сақтау маңызды. Біріншіден, банк картасының нөмірін, CVV кодын және SMS арқылы келген растау кодтарын ешкімге бермеу керек. Екіншіден, белгісіз нөмірден хабарласқан адамдардың сөзіне сене салмай, ақпаратты ресми дереккөздер арқылы тексерген жөн. Үшіншіден, күмәнді сілтемелерге өтпеу және белгісіз қосымшаларды жүктемеу қажет.
Сарапшылар алаяқтардың басты қаруы – адамның сенімі мен асығыстығы екенін айтады. Сондықтан кез келген қаржылық операция алдында ақпараттың дұрыстығына көз жеткізу маңызды.