Арыс қаласында елді мекендердің санитарлық жағдайын жақсартуға бағытталған бақылау жұмыстары күшейтілді. «Таза Қазақстан» бағдарламасы мен «Заң және тәртіп» қағидаты аясында арнайы жұмысшы топ қала аумағында және ауылдық округтерде рейдтер өткізуде.
Тексеру кезінде мамандар тұрғындарға абаттандыру талаптарын сақтау бойынша түсіндіру жұмыстарын жүргізіп, анықталған құқықбұзушылықтарға қатысты заң аясында шара қабылдап жатыр.
Қала әкімдігінің мәліметінше, қыркүйек айының алғашқы күндерінен бері тазалық талаптарын бұзған 13 азаматқа әкімшілік құқықбұзушылық туралы хаттама толтырылған. Ал жыл басынан бері осындай талаптарды орындамаған 346 азаматқа қатысты тиісті шаралар қабылданған.
Жауапты мамандар қоқыс пен тұрмыстық қалдықтарды белгіленбеген жерлерге тастауға болмайтынын еске салды. Тұрғындардан өз үйлері мен оларға іргелес аумақтардың тазалығына жауапкершілікпен қарау сұралды.
Қала аумағындағы рейдтік және профилактикалық іс-шаралар алдағы уақытта да тұрақты түрде жалғасады.