Арыс қаласындағы Сәкен Сейфуллин атындағы мектептің 2006 жылғы түлектері көпшілікке үлгі боларлық игі іс жасады. Олар өмірден өткен сыныптасының отбасына төрт бөлмелі жаңа баспана сыйлап, көптің ықыласына бөленді.
Әлеуметтік желіде тараған видеода марқұмның жары мен балаларына үй кілтінің табысталған әсерлі сәті көрсетілген. Түлектердің айтуынша, баспана толық жөндеуден өткізіліп, барлық жағдайы жасалған.
Бұл бастама көпшілік тарапынан жоғары бағаланып, желі қолданушылары бұрынғы сыныптастардың ауызбіршілігіне, азаматтық ұстанымына және жанашырлығына тәнті болды.
Қазіргі қоғамда мұндай қайырымдылық пен бауырмалдықтың маңызы зор. Түлектердің бұл әрекеті — достықтың уақытпен өлшенбейтінін, адамдық қасиеттің әрдайым биік тұратынын тағы бір дәлелдеді.