Өзбекстан Республикасының Ташкент облысында Түркістан және Ташкент облыстары кәсіпкерлерінің қатысуымен «Шекарасыз ынтымақтастық» халықаралық бизнес-форумы өтті. Іс-шара екі өңір арасындағы сауда-экономикалық байланысты нығайтып, инвестициялық әріптестікті жаңа деңгейге көтеруге бағытталды.
Форум аясында кәсіпкерлер өндіріс, ауыл шаруашылығы, логистика, туризм және өңдеу өнеркәсібі салаларындағы ынтымақтастық мүмкіндіктерін талқылады. Тараптар бірлескен жобаларды жүзеге асыру, жаңа өндіріс орындарын ашу және өзара сауда көлемін арттыру мәселелеріне ерекше назар аударды.
Сарапшылардың пікірінше, географиялық жақындық пен тарихи байланыстар Түркістан мен Ташкент облыстарының экономикалық әлеуетін тиімді пайдалануға мүмкіндік береді. Мұндай кездесулер өңіраралық интеграцияны күшейтіп қана қоймай, жаңа жұмыс орындарының ашылуына және кәсіпкерліктің дамуына серпін береді.
Халықаралық бизнес-форум екі елдің іскер топтары арасындағы байланысты нығайтып, Қазақстан мен Өзбекстан арасындағы стратегиялық серіктестіктің жаңа кезеңіне жол ашқан маңызды алаңға айналды.