Дереккөз, фото: Түркістан қаласы әкімдігі
Түркістан қаласында абаттандыру және көгалдандыру жұмыстары жүйелі түрде жалғасуда. Қала келбетін жақсарту және тұрғындарға қолайлы орта қалыптастыру мақсатында кең көлемді жұмыстар атқарылып жатыр.
Жалпы қала аумағында 2 миллионға жуық гүл көшеттері отырғызылды. Олардың қатарында шалпей, петуния, бархатцы, циннея, виола, катарантус, колеус және целлозия секілді біржылдық және көпжылдық сәндік гүлдер бар.
Көгалдандыру жұмыстары қаланың негізгі кіреберіс аймақтарын, Әкімшілік-іскерлік орталық аумағын, мәдени-рухани нысандар маңын, халықаралық және жергілікті туристік орындарды, сондай-ақ орталық көшелер мен қоғамдық кеңістіктерді қамтиды.
Аталған шаралар қала аумағын көркейтіп қана қоймай, экологиялық ахуалды жақсартуға және тұрғындар мен қонақтар үшін жайлы орта қалыптастыруға бағытталған.