Түркістан облысының полицейлері республикалық «Отбасындағы зорлық-зомбылықсыз Қазақстан» челленджіне үн қосты. ҚР ІІМ бастамасымен ұйымдастырылған бұл акцияны Түркістан тәртіп сақшылары Павлодар облысынан қабылдап, «Түркістан Арена» стадионында ауқымды флешмоб өткізді.
Шараға құқық қорғау органдары қызметкерлерімен қатар, жасөспірімдер, еріктілер, мемлекеттік қызметшілер мен қала жастары қатысты. «Зорлық-зомбылыққа жол жоқ!» деген ұранмен басталған акция бейбіт әрі құрметке негізделген отбасылық құндылықтарды насихаттауға бағытталды.
Бұл бастама қоғамдағы зорлықтың алдын алуға, салауатты қарым-қатынас мәдениетін қалыптастыруға, әр отбасының қауіпсіздігі мен берекесін арттыруға ықпал етпек. Түркістан облысының полиция департаменті эстафетаны Батыс Қазақстан облысына жолдап, ізгі тілектерін білдірді.