Сенатор Марат Қожаев жол ережесін жиі бұзатын жүргізушілерге қатысты қатаң шаралар енгізуді ұсынды. Ол әсіресе ауқатты отбасылардың балалары ережелерді елемей, көлікті ойыншыққа айналдырғанын айтты.Бұл туралы Arysinfo.kz тілшісі хабарлайды.
Мысалы, бір жүргізуші бір жыл ішінде 143 рет ереже бұзып, 3 миллион теңгеден астам айыппұл төлеген. Бірақ бұл да оны тоқтатпаған. Сенатордың пікірінше, жай айыппұл салу жеткіліксіз, сондықтан келесі шараларды қарастыру қажет:
Егер жүргізуші 10 және одан да көп ереже бұзса, оны қайтадан теориялық емтихан тапсыруға міндеттеу.
Қайталама заңбұзушылықтар үшін куәлікті уақытша тоқтату мүмкіндігін енгізу.
Жүйелі түрде ереже бұзатындарға айыппұлды 50% жеңілдікпен төлеу мүмкіндігін алып тастау.
«Олар жолда әдейі қауіпті маневр жасап, басқалардың өміріне қауіп төндіреді. Бұл тоқтатылуы керек», – деді Қожаев.