Ақтауда өткен кезекті турда «Арыс» футбол клубы жанкүйерлерін ірі жеңіспен қуантты. Екінші лига чемпионатының 5-туры аясында жерлестеріміз жергілікті «Каспий» (жастар) командасымен кездесіп, 3:0 есебімен басым түсті.
Алаң қожайындарын алғашқы минуттардан-ақ қыспаққа алған арыстықтар матчты сенімді бастады. 35-минутта Еркебұлан Амангелді есеп ашса, араға жеті минут салып Тимур Қуантаев есепті 2:0-ге жеткізді. Екінші таймда да қарқынын бәсеңдетпеген «Арыс» ойыншылары 88-минутта Батыр Ибраһимнің голымен кездесуді түйіндеді.
Команданың бұл жеңісі – ойыншылардың ұйымшылдығы мен жаттықтырушылар штабының жүйелі еңбегінің нәтижесі. Жеңіс арқасында «Арыс» турнирлік кестеде өз позициясын жақсарта түсті.
Алда тағы бірқатар маңызды ойындар бар. Дегенмен, бұл айқын жеңіс командаға үлкен серпін беретіні анық.