Дереккөз, фото: Шымкент қаласы әкімдігі
Шымкент қаласында тұрғындарды қолжетімді баспанамен қамту бағытындағы жұмыстар жалғасуда. Бұл жолы тұрғын үй кезегінде тұрған 50 азамат жаңа пәтерге ие болды. Салтанатты рәсімге қала әкімі Ғабит Сыздықбеков қатысты.
Пәтерлер Ақжайық шағынауданындағы көпқабатты тұрғын үйлерден берілді. Баспаналар мемлекеттік бағдарламалар және Отбасы банкі арқылы жүзеге асырылатын жеңілдетілген несиелеу тетіктері негізінде ұсынылды.
Қоныс иелері «2-10-20» және «5-10-20» бағдарламалары бойынша төлем қабілеттілігін растаған азаматтар қатарынан іріктелді.
Тұрғын үйлерді бөлу кезінде әлеуметтік қолдауды қажет ететін отбасыларға басымдық берілді. Атап айтқанда, көпбалалы отбасылар, ерекше бала тәрбиелеп отырған толық емес отбасылар, мүмкіндігі шектеулі азаматтар мен бюджет саласының қызметкерлері баспанамен қамтылды.
Жаңа үйлер заманауи құрылыс талаптарына сай салынып, қажетті инфрақұрылыммен қамтамасыз етілген. Мұндай жобалар қала тұрғындарының тұрмыс сапасын жақсартуға, тұрғын үй қорын ұлғайтуға және әлеуметтік қолдауды күшейтуге бағытталған.