АҚШ президенті Дональд Трамп Иранға қарсы әскери операциялар арқылы Вашингтонның аймақтағы мүддесін қорғап, Тегеранның әскери әлеуетін әлсіретуді көздеді. Алайда соғыс аяқталуға жақындаған тұста басты сұрақ туындайды: Ақ үй шынымен көздеген мақсатына жетті ме?
Америка тарапы Иранның әскери инфрақұрылымына ауыр соққы бергенін мәлімдеп отыр. Пентагон дерегінше, әскери кемелердің едәуір бөлігі жойылып, әуе шабуылына қарсы қорғаныс жүйелері істен шығарылған. Бұл Тегеранның әскери мүмкіндігін әлсіреткені анық.
Дегенмен Иран толықтай тізе бүкті деуге негіз жоқ. Соғыс барысында Ислам Республикасы зымырандық әлеуетінің әлі де сақталғанын көрсетті. Бұған қоса, Ормұз бұғазы арқылы әлемдік мұнай тасымалына ықпал ету мүмкіндігін де жоғалтқан жоқ. Бұл әлем экономикасы үшін маңызды қысым құралы болып қала береді.
Сарапшылардың пікірінше, АҚШ тактикалық деңгейде табысқа жеткенімен, стратегиялық мақсаттардың толық орындалғанын айту ерте. Иран аймақтағы ықпалын сақтап қалды, билік ауысса да саяси жүйе күйреген жоқ, ал ядролық мәселе ашық күйінде қалды.
Сондықтан бүгінгі жағдайды Трамптың сөзсіз жеңісі немесе Иранның жеңілісі деп бағалау қиын. Соғыстың нағыз нәтижесі алдағы келіссөздер мен Таяу Шығыстағы жаңа геосаяси тепе-теңдік қалыптасқан кезде ғана белгілі болады.