Құрылтай депутаттығына кандидаттар сайлауалды науқан аясында кәсіпорын жұмысшыларымен кездесіп, еңбек ұжымының ұсыныс-тілектерін тыңдады. Басқосуда елдің әлеуметтік-экономикалық дамуы, еңбек адамының мәртебесі және қоғамдағы өзекті мәселелер кеңінен сөз болды.
Кездесуде кандидаттар өздерінің сайлауалды бағдарламаларындағы негізгі бағыттарды таныстырып, халықтың талап-тілегін ескерудің маңыздылығына тоқталды. Әсіресе жұмысшылардың әлеуметтік жағдайын жақсарту, тұрақты жұмыс орындарын көбейту, еңбекті қорғау және өндірістегі қауіпсіздік мәселелері назарға алынды.
«Құрылтай – халықтың үні естілетін алаң» деген ұстаныммен өткен кездесуде жұмысшылар да өздерін толғандырған мәселелерді ашық жеткізді. Олар еңбекақы, тұрғын үй, инфрақұрылым, жастарды жұмыспен қамту және әлеуметтік қолдау шараларына қатысты ұсыныстарын ортаға салды.
Кандидаттар көтерілген мәселелердің маңыздылығын атап, ел болашағына қатысты шешімдер халықтың нақты сұранысына негізделуі тиіс екенін жеткізді.
Алдағы сайлау – азаматтардың ел дамуына қатысты өз таңдауын білдіретін маңызды саяси кезең. Сондықтан әрбір дауыс пен әрбір ұсыныстың мәні зор. Еңбек ұжымдарымен мұндай ашық кездесулер қоғам мен билік арасындағы байланысты нығайтып, ортақ мәселелерді шешуге жол ашады.