Қазақстанда жазғы шомылу маусымы басталғалы бері судағы қауіпсіздік мәселесі өзекті күйінде қалып отыр. Төтенше жағдайлар министрлігінің мәліметінше, осы уақытқа дейін су айдындарында 69 бала қаза тапқан. Қайғылы оқиғалардың басым бөлігі ата-ананың қарауынсыз қалған балалардың және шомылуға тыйым салынған орындарға барғандардың қатысуымен болған.
Мамандардың айтуынша, балалардың қауіпсіздігін қамтамасыз ету – ең алдымен ересектердің жауапкершілігі. Рұқсат етілген жағажайларды ғана таңдау, балаларды қараусыз қалдырмау, мас күйде суға түспеу және қауіпсіздік ережелерін сақтау – адам өмірін сақтап қалатын негізгі талаптар.
ТЖМ өңірлерде рейдтік іс-шараларды күшейтіп, түсіндіру жұмыстарын жүргізіп жатыр. Сонымен қатар, судағы қауіпсіздік талаптарын бұзған азаматтарға әкімшілік жауапкершілік қарастырылған. Құтқарушылар қайғылы жағдайлардың алдын алу үшін тұрғындарды сақ болуға шақырады