Қазақстанда мемлекеттік жәрдемақы тағайындау тәртібіне өзгеріс енгізілуде. Енді 39 мемлекеттік жәрдемақының 14 түрі азаматтардың мұқтаждық деңгейін ескере отырып тағайындалады.
Жаңа тәртіп әлеуметтік қолдауды нақты қажеттілігі бар азаматтарға бағыттауды көздейді. Алайда бұл өзгеріс барлық жәрдемақыға бірдей қатысты емес. Әр төлем түрі жеке тәртіппен қаралады.
Мұқтаждық деңгейі ескерілетін жәрдемақылардың қатарында бала тууына байланысты төлемдер, көпбалалы отбасыларға берілетін жәрдемақылар, мүгедектігі бар адамдарға күтім жасайтын ата-аналар мен басқа азаматтарға берілетін төлемдер бар.
Сонымен қатар мүгедектікке байланысты, асыраушысынан айырылу жағдайындағы жәрдемақылар мен жерлеуге берілетін төлемдер де жаңа тәртіп аясында қарастырылады.
Бұдан бөлек, соғыс ардагерлеріне, қаза тапқан әскери қызметкерлердің отбасыларына және мемлекеттік атақтарға ие азаматтарға төленетін кейбір арнайы мемлекеттік жәрдемақылар да мұқтаждық деңгейін ескеру жүйесіне енгізілген.
Министрлік бұл өзгерістердің барлық әлеуметтік төлемге автоматты түрде қолданылмайтынын атап өтті. Әр жәрдемақының тағайындалу талаптары бөлек қаралады.
Яғни әлеуметтік төлем алатын азаматтар үшін ең басты мәселе – жаңа талаптардың нақты қай жәрдемақыға және қандай жағдайда қолданылатынын білу. Өзгерістің мақсаты – әлеуметтік көмекті мұқтаж азаматтарға барынша дәл бағыттау.