дереккөз фото:atamekenbusiness_qaz
«Семей орманы» резерватындағы алапат өрттен кейін орман шаруашылығын дамытуға 20 миллиард теңгеден астам қаржы бөлініп, саладағы материалдық-техникалық база айтарлықтай күшейтілді. Жүздеген өрт сөндіру көлігі, тракторлар мен арнайы техникалар сатып алынып, резерваттың техника паркі толық жаңартылды.
Сонымен қатар орманшылардың жалақысы екі есеге өсіп, өрт сөндіруге қатысатын қызметкерлерге 100 пайыздық үстемақы енгізілді. Қазір орман өрт сөндірушісі шамамен 250 мың теңге, жүргізуші 275 мың теңге, ал станция басшысы 355 мың теңге жалақы алады.
Дегенмен өмірін қауіп-қатерге тігіп, табиғатты қорғап жүрген мамандар үшін бұл еңбекақы жеткілікті ме деген сұрақ қоғамда әлі де өзекті. Өйткені олардың жұмысы тек физикалық ауырлықпен емес, адам өміріне төнетін қауіппен де байланысты. Техника жаңарғанымен, сала мамандарының әлеуметтік жағдайын жақсарту мәселесі күн тәртібінен түскен жоқ.